Sa mundo ng pulitika sa Amerika, isa sa mga pinakakilalang pangalan sa hanay ng kabataang konserbatibo ay si Charlie Kirk. Pero sino nga ba siya, at paano siya naging “legendary” ayon mismo kay Pangulong Donald Trump?

Si Charlie Kirk ay isinilang noong Oktubre 14, 1993 sa Illinois, USA. Bata pa lang, aktibo na siya sa mga isyung panlipunan—mula sa pagkontra sa taas-presyo ng pagkain sa school cafeteria hanggang sa pagsuporta sa mga kandidato sa lokal na halalan. Hindi siya nagtapos ng kolehiyo; iniwan niya ang Harper College upang ituloy ang kanyang adbokasiya sa pulitika. “I joke that I wasn’t smart enough to go to a four-year school,” biro pa niya minsan.

Noong 2012, sa edad na 18, itinatag niya ang Turning Point USA, isang organisasyong layuning hikayatin ang kabataan na yakapin ang prinsipyo ng free market at limitadong pamahalaan. Sa tulong ng mga donor gaya ni Donald Trump Jr. at Foster Friess, lumago ang TPUSA bilang makapangyarihang puwersa sa konserbatibong kilusan.

Bukod sa pagiging aktibista, si Kirk ay isa ring media personality. Host siya ng The Charlie Kirk Show, isang sikat na podcast na umabot sa top 10 sa Apple News charts. Sa kanyang mga episode, tinalakay niya ang mga isyung gaya ng immigration, gender roles, at edukasyon—madalas na may matapang na paninindigan.

Noong 2021, pinakasalan niya si Erika Frantzve, dating Miss Arizona USA, na isa ring entrepreneur at faith-based influencer. May dalawa silang anak—isang babae na isinilang noong 2022, at isang lalaki noong Mayo 2024.

Sa kabila ng kanyang kontrobersyal na mga pananaw, si Kirk ay naging mahalagang boses sa kampanya ni Trump, lalo na sa mga kabataang botante. “No one understood or had the Heart of the Youth in the United States of America better than Charlie,” ani Trump sa kanyang tribute matapos ang pamamaslang kay Kirk sa isang campus event sa Utah noong Setyembre 10.

Mula sa pagiging high school activist hanggang sa pagiging pangunahing tagapagsalita ng konserbatibong kabataan, si Charlie Kirk ay patunay na kahit wala kang diploma, puwede kang maging makapangyarihang tinig—basta may paninindigan, mikropono, at podcast.