MANILA, Philippines — Naglabas ng pagkabahala si International Criminal Court (ICC) assistant to counsel Atty. Kristina Conti sa patuloy na hindi pagdalo ni Senator Ronald “Bato” dela Rosa sa Senado sa loob ng halos isang buwan. Ayon kay Conti, kung ang isang simpleng empleyado ng gobyerno ay absent ng tatlong linggo ay maaaring masuspinde o masisi, bakit kaya puwedeng hindi pumasok ang isang senador.

“Concerned ako na patapos na ang taon, absent siya. Simpleng government employee ka nga, eh, a-absent ka ng tatlong linggo, matsutsugi ka na. Bakit siya kaya, puwede na lang hindi pumasok?” ani Conti sa mga mamamahayag nitong Linggo, Nobyembre 30.

Hindi na nakadalo si Sen. Dela Rosa sa Senado simula noong Nobyembre 8, kasunod ng anunsyo ni Ombudsman Jesus Crispin Remulla na naglabas ng arrest warrant ang ICC laban sa senador. Ang pagkakawala niya sa Senado ay kaugnay ng kinakaharap niyang kaso sa crimes against humanity, na may kaugnayan sa kanyang papel bilang hepe ng Philippine National Police (PNP) noong panahon ng “war on drugs” sa administrasyon ni dating Pangulong Rodrigo Duterte.

Ayon kay Conti, seryoso ang isyu dahil may kinalaman ito sa pananagutan sa mga umano’y paglabag sa karapatang pantao, at mahalaga ang presensya ni Dela Rosa sa Senado upang matiyak ang tamang proseso at pananagutan.

Sa kabila nito, nananatiling wala pang opisyal na tugon mula sa tanggapan ni Sen. Dela Rosa hinggil sa kanyang patuloy na hindi pagdalo sa mga sesyon. Ang isyu ay patuloy na binabantayan ng publiko at mga legal na eksperto, lalo na’t papalapit na ang pagtatapos ng taon. (Larawan: Google)