December 17, 2025 — Nabanas si Negros Occidental 3rd District Rep. Javier “Javi” Miguel Benitez matapos magbiro ang ilang senador sa Bicameral Conference Committee hearings na inihalintulad ang mga TUPAD workers sa mga persons deprived of liberty (PDLs) o inmates.

Sa isang Facebook post noong Disyembre 16, sinabi ni Benitez na hindi niya maaaring palampasin ang naturang biro, lalo na’t may mga benepisyaryo ng Tulong Panghanapbuhay sa Ating Disadvantaged/Displaced Workers (TUPAD) program na nanonood ng live stream ng bicam. “Gusto ko lang linawin, at hindi ko puwedeng palampasin ang ganitong biro. Lalo na dahil may mga TUPAD workers na nanood kanina sa bicam live stream,” ani Benitez.

Ang biro ay lumabas matapos mapansin nina Senators Erwin Tulfo at Loren Legarda ang pulang uniporme ng mga TUPAD workers na dumalo sa pagdinig. Sa halip na matawag na beneficiaries, inihalintulad umano sila sa mga bilanggo dahil sa kulay ng kanilang suot.

Mariin itong tinutulan ni Benitez, 31, na nagsabing hindi dapat gawing biro ang mga manggagawang benepisyaryo ng programa. “We should respect our TUPAD workers. They are not prisoners, they are hardworking Filipinos who deserve dignity,” dagdag pa niya.

Ang TUPAD program ng Department of Labor and Employment (DOLE) ay nagbibigay ng emergency employment sa mga displaced workers, underemployed, at seasonal workers. Sa ilalim ng programa, binibigyan sila ng pansamantalang trabaho gaya ng community clean-up at iba pang public service tasks, kapalit ng daily wage.

Para kay Benitez, ang biro ng mga senador ay nakakasakit sa dignidad ng mga benepisyaryo. “Hindi sila dapat gawing katatawanan. Ang TUPAD ay tulong para sa mga kababayan nating nangangailangan, hindi biro,” aniya.

Nag-viral ang kanyang post at umani ng suporta mula sa mga netizens na naniniwalang dapat igalang ang mga TUPAD workers. Ang insidente ay nagbukas ng mas malawak na diskusyon tungkol sa pagtrato sa marginalized workers at kung paano dapat kumilos ang mga mambabatas sa harap ng publiko.