MADRID — Matagumpay na natagpuan ng Spanish National Police ang nawawalang obra ni Pablo Picasso na Still Life with Guitar (1919), ilang linggo matapos itong mawala habang inihahanda para sa isang pansamantalang eksibisyon sa Granada.

Ayon sa ulat ng El País at GMA News, ang maliit na framed gouache at graphite artwork na may sukat na 12.7 x 9.8 cm ay bahagi ng 56 na likhang sining na inilipat mula Madrid patungong Centro Cultural CajaGranada. Nawalan ng bakas ang painting noong Oktubre 3, at isinampa ang reklamo ng organizers noong Oktubre 10 matapos mapansing nawawala ito sa mga crate.

Sa imbestigasyon, lumitaw na posibleng hindi na-load ang painting sa transport truck, at nanatili lamang ito sa Madrid. “The painting may not have been loaded onto the transport truck before the shipment left Madrid,” ayon sa pahayag ng pulisya sa social media.

Ang artwork ay pag-aari ng isang pribadong kolektor at nakarehistro sa Interpol’s global database of Stolen Works of Art. May tinatayang insurance value ito na €600,000 (₱37.2 milyon), ayon sa Ledor Fine Art.

Bagama’t hindi pa tiyak kung may krimen na naganap, patuloy ang imbestigasyon ng historical heritage brigade. Naglabas rin ng mga larawan ang pulisya kung saan makikitang sinusuri ng mga forensic expert ang painting habang nakasuot ng sterile bodysuits at mask.

Ang insidenteng ito ay muling nagpapaalala sa kahalagahan ng mahigpit na inventory at seguridad sa paghawak ng mga mahalagang likhang sining.

Larawan mula Spanish National Police/AFP/Getty Images