MANILA — Ipinahayag ni Cavite 4th District Representative Kiko Barzaga ang kaniyang pormal na pag-atras ng suporta kay House Speaker Martin Romualdez, kasabay ng panawagan para sa isang masusing imbestigasyon hinggil sa umano’y iregularidad sa paggamit ng pondo para sa flood control projects sa iba’t ibang bahagi ng bansa.

Ayon kay Barzaga, panahon na upang busisiin ang paggamit ng pondo na inilaan para sa mga proyektong dapat sana ay nakatutulong upang maiwasan ang malawakang pagbaha. Giit niya, may mga ulat na nagsasabing hindi malinaw kung saan napupunta ang malaking bahagi ng alokasyon, samantalang nananatiling apektado ng pagbaha ang maraming komunidad.

Ang pondo para sa flood control ay para sa bayan, hindi para sa bulsa ng iilan. Tungkulin ng Kongreso na tiyakin na ang pondo ng taumbayan ay nagagamit nang tama, lalo na sa mga proyektong may direktang epekto sa kaligtasan at kabuhayan ng mga mamamayan.

Samantala, nananatiling tahimik pa si Speaker Romualdez hinggil sa panawagang ito. Subalit inaasahang magkakaroon ng matinding diskusyon sa Kamara, lalo’t isa ito sa mga unang beses na may mambabatas na tahasang bumawi ng suporta laban sa lider ng House of Representatives.

Patuloy namang umaasa ang publiko na lalabas ang katotohanan at mananagot ang sinumang mapatutunayang sangkot sa iregularidad. (Larawan: Kiko Barzaga / Fb)