December 17, 2025 — Bumwelta si Bicol Saro Party-list Rep. Terry Ridon laban sa komedyanteng si Pokwang (Marietta Subong) matapos nitong magbigay ng pasaring kaugnay sa kontrobersyal na road rage incident na kinasangkutan ng kanyang kapatid na si Carlo Subong.

Sa isang pahayag, iginiit ni Ridon na hindi dapat ilihis ang usapan at malinaw kung sino ang tunay na biktima sa insidente. “We take exception to the remarks made by Ms. Marietta ‘Pokwang’ Subong… Hindi kayo ang biktima dito,” ani Ridon. Dagdag pa niya, ang dapat na sentro ng usapan ay ang lalaking si Crispin Villamor at ang kanyang anak na nadamay sa galit ni Subong.

Matatandaang nakuhanan ng video si Carlo Subong na nanampal ng isang lalaking nagtutulak ng kariton kasama ang anak nito sa Antipolo City. Dahil dito, agad na sinuspinde ng Land Transportation Office (LTO) ang kanyang lisensya ng 90 araw at binigyan ng show cause order.

Humingi ng paumanhin si Pokwang sa pamilya ng biktima ngunit binatikos ang mga netizens na nagpo-post ng larawan ng kanyang pamilya. Nagbanggit din siya ng isang “mambabatas” na umano’y nakikisangkot sa isyu, bagay na agad na sinagot ni Ridon. Ayon sa kongresista, ang mga pahayag ni Pokwang hinggil sa cyberbullying at cyberlibel ay “diversionary” at hindi dapat gawing sentro ng usapan.

“Ang pananagutan ay malinaw na nasa kapatid ni Ms. Subong. Hindi dapat gawing ‘victim’ ang pamilya Subong sa mata ng publiko,” giit ni Ridon.

Samantala, patuloy na pinag-uusapan sa social media ang insidente, na muling nagbukas ng diskusyon tungkol sa accountability ng public figures at kanilang pamilya. Para sa marami, ang viral na kaso ay paalala na ang mga aksyon sa kalsada ay may direktang epekto sa mga ordinaryong mamamayan, at ang pananagutan ay hindi dapat takasan.

Sa kabila ng paghingi ng paumanhin ni Pokwang, nanindigan si Ridon na ang tunay na biktima ay ang ama at anak na nasaktan sa insidente, at hindi ang pamilya ng suspek.