PANGASINAN — Dumadami ang mga kaso ng influenza-like illness (ILI) sa Region 1 habang nagsisimula ang malamig na panahon dulot ng amihan, ayon sa Department of Health–Center for Health Development (DOH-CHD). 

Sa datos ng ahensya, umakyat ang bilang ng mga pasyente na may sintomas ng trangkaso sa ikatlong linggo ng Disyembre, kasabay ng pagbaba ng temperatura sa rehiyon.

Sa Dagupan City, dagsa ang mga residente sa health centers matapos makaranas ng ubo, hirap sa paghinga, at lagnat. Isa sa kanila si Rosemarie Tamondong na nagsabing, “Kasi hindi na ako nakakatulog ng gabi. Ubo ako ng ubo tas hirap akong makahinga. Yung mata ko, nag-iinit siya,” habang humingi ng tulong medikal. 

Sa bayan ng Mangaldan, kabilang sa mga tinamaan ang tatlong-buwang gulang na anak ni Mary Ann Lozano. “Lahat na kami sa bahay may sipon, kawawa kung makahawa pa talaga,” aniya.

Batay sa monitoring ng DOH-CHD Region 1, mula Enero hanggang Nobyembre 22, 2025, naitala ang 11,459 kaso ng ILI, mas mababa ng 8.8 porsyento kumpara sa 12,567 kaso sa parehong panahon noong 2024. Gayunpaman, nagbabala ang mga health officials na inaasahang tataas pa ang bilang ng mga kaso sa Disyembre, Enero, at Pebrero — ang mga buwan na karaniwang pinakamalamig sa bansa.

Ayon sa mga doktor, karaniwan nang tumataas ang mga kaso ng trangkaso tuwing malamig ang panahon dahil mas mabilis kumalat ang virus sa ganitong kondisyon. Pinayuhan ng DOH ang publiko na magpabakuna laban sa trangkaso, palakasin ang resistensya, at agad kumonsulta sa health centers kapag nakaranas ng sintomas.

Dagdag pa ng mga health experts, mahalaga ring umiwas sa matataong lugar kung may ubo o sipon, magsuot ng face mask, at panatilihin ang tamang hygiene upang hindi makahawa sa iba. “Historically kasi, makikita natin na tumataas ang kaso ng influenza-like illnesses lalo na sa peak ng cold season,” pahayag ng isang opisyal ng DOH Region 1.

Sa kabila ng bahagyang pagbaba ng kabuuang bilang kumpara sa nakaraang taon, nananatiling alerto ang mga awtoridad upang maiwasan ang posibleng pagdami ng kaso ngayong papalapit ang pinakamalamig na bahagi ng taon.