WASHINGTON D.C. — Umusbong ang mas matinding tensyon sa pulitika ng Estados Unidos matapos ang pagkamatay ni Charlie Kirk, isang konserbatibong aktibista at kaalyado ni dating Pangulong Donald Trump. Si Kirk, 31-anyos at tagapagtatag ng Turning Point USA, ay binaril ng sniper sa leeg habang nagsasalita sa Utah Valley University sa Orem, Utah nitong Miyerkules. Agad siyang isinugod sa ospital ngunit binawian ng buhay. Naiwan niya ang kanyang asawa at dalawang anak.

Habang nagpupugay si Trump at iba pang kaalyado kay Kirk, hindi pa rin natutukoy ang salarin. Dalawang katao ang pansamantalang inaresto ngunit agad ding pinalaya dahil sa kakulangan ng ebidensya. Patuloy ang manhunt ng pulisya sa tunay na bumaril.

Kasunod ng insidente, nagbigay ng matinding pahayag si Elon Musk sa social media platform na X. Aniya: “The Left is the party of murder.” Dagdag pa niya, kung hindi umano titigilan ng kaliwa ang kanilang panig, “our choice is fight or die.” Sumang-ayon din siya sa ilang kontrobersyal na post na nag-akusang mayayamang personalidad gaya nina George Soros at Bill Gates ang nagpopondo ng “left-wing terrorism,” bagama’t walang inilatag na ebidensya.

Mabilis namang kinondena ng mga Demokratiko ang pamamaslang. Si California Governor Gavin Newsom ay nagsabi: “The attack on Charlie Kirk is disgusting, vile, and reprehensible… We must reject political violence in EVERY form.” Gayundin, nagpahayag ng pakikiramay sina dating House Speaker Nancy Pelosi at dating kongresista Gabby Giffords.

Samantala, binatikos si Musk mismo sa kanyang platform. Tinawag siyang “delikado” ng ilang netizens at pinayuhang burahin ang kanyang account. May iba pang nagpakita ng datos na karamihan ng mass shooting suspects sa Amerika ay may kaugnayan sa kanan.

Sa kabila ng kontrobersiya, malinaw na muling lumalalim ang hidwaan ng kaliwa at kanan sa Amerika, kasabay ng panawagan ng marami na wakasan ang politikal na karahasan. (Larawan: CNN / Google)