GINGOOG CITY, MISAMIS ORIENTAL — Isang ama ang naaresto matapos patayin ang kanyang dalawang anak na may edad 20 at 21, na sinasabing may kondisyon sa pag-iisip, sa pamamagitan ng pambubugbog gamit ang martilyo.

Batay sa ulat ng GMA Regional TV One Mindanao, nahuli ang suspek nitong Huwebes sa isang hot pursuit operation matapos siyang matagpuan sa ibabaw ng flyover, kung saan pinaghihinalaang magtatangkang tumalon.

Ayon sa imbestigasyon ng pulisya, natutulog ang mga biktima nang bigla silang atakihin ng kanilang ama. Pinukpok umano sila sa ulo ng martilyo na naging sanhi ng kanilang agarang pagkamatay. Sinabi ni Police Major Joann Navarro, tagapagsalita ng PRO-10, na idinahilan ng suspek na may problema sa pag-iisip ang kanyang mga anak kaya pinili niyang tapusin na ang kanilang paghihirap.

Ngunit ayon sa kapatid ng suspek, matagal nang sinasaktan ng ama ang kanyang mga anak at maging ang asawa. Posible umanong ang patuloy na pananakit ang nagdulot ng problema sa pag-iisip ng mga biktima. Dagdag pa niya, hindi ang ama ang nag-aalaga sa mga anak kundi ang asawa, habang ang suspek ay umano’y palaging umiinom at nagiging pabigat sa pamilya.

Nagpahayag ang pamilya ng kanilang intensyon na magsampa ng kasong parricide laban sa suspek. Bukod dito, humihingi sila ng tulong para sa gastusin sa pagpapalibing ng magkapatid na biktima.