MANILA — Ikinalungkot ng government contractor na si Curlee Discaya ang pagkakaaresto ng kanyang asawa na si Sarah Discaya, na pormal na ikinulong ng National Bureau of Investigation (NBI) noong Huwebes ng gabi, Disyembre 18, 2025, matapos maglabas ng warrant of arrest ang Lapu-Lapu City Regional Trial Court.

Si Sarah, may-ari ng St. Timothy Construction Corporation, ay sumuko sa NBI noong Disyembre 9 bilang paghahanda sa naturang warrant. Kalaunan ay isinailalim siya sa booking process, kinunan ng fingerprint at litrato, bago inilipat sa pasilidad ng NBI sa Muntinlupa City.

Kasama sa mga kinasuhan si Ma. Roma Angeline Rimando, presidente ng St. Timothy Construction at kamag-anak ni Curlee, na inaresto rin ng mga awtoridad. Ang mga akusado ay nahaharap sa non-bailable malversation of public funds at graft charges, kaugnay sa umano’y ghost flood control project na nagkakahalaga ng ₱96.5 milyon sa Davao Occidental.

Sa kabila ng pagkakaaresto, nanatiling tahimik si Sarah sa media, ngunit nakunan ng mga larawan na nakasuot ng dilaw na detainee shirt habang sumasailalim sa proseso ng booking. Sa isang pagkakataon, sarkastiko pa niyang sinabi sa mga mamamahayag: “Happy? Happy! Yes!” habang nag-thumbs up, kasabay ng luha.

Samantala, si Curlee ay dinala rin sa Department of Justice para sa hiwalay na preliminary investigation sa ₱7.1 bilyong tax evasion complaint na isinampa ng Bureau of Internal Revenue laban sa mag-asawa.

Ang kaso laban sa mga Discaya ay bahagi ng mas malawak na imbestigasyon ng Ombudsman at NBI sa mga umano’y anomalya sa flood control projects sa iba’t ibang bahagi ng bansa. Sa isang mensahe, binigyang-diin ni Pangulong Ferdinand Marcos Jr. na ang mga kasong ito ay “simula pa lamang” ng mas malawak na crackdown sa katiwalian sa imprastruktura.